Qagħaq tal-Ħmira

L-iktar li fiha xogħol din ir-riċetta hija f’li toqgħod tistenna l-għaġina toqgħod; apparti minn hekk, mhix daqshekk diffiċli…

Ingredjenti

• 500g dqiq
• 200g zokkor
• 200g marġerina jew butir
• 13g ħmira
• nofs kuċċarina qronfol mitħun
• qoxra ta’ lumija maħkuka
• 180ml ilma fietel
• żerriegħa tal-ġulġlien
• kuċċarina trab tal-vanilla

Metodu

1. Qabel tibda, ma tagħmilx ħażin jekk tħakkek il-qoxra tal-lumija bil-lest u tqatta’ l-marġerina (jew butir) f’kaxex żgħar
2. Ixħet dawn l-ingredjenti fi skutella kbira u ħallat tajjeb flimkien: dqiq, ħmira, zokkor, qronfol mitħun u t-trab tal-vanilla
3. Żid il-qoxra tal-lumija
4. Erġa’ ħallat tajjeb sakemm ikollok taħlita uniformi
5. Żid il-marġerina (jew butir) ma’ din it-taħlita u għaġen b’idejk sakemm ikollok taħlita mrammla. Bħal dejjem, irridu nkunu ċerti li t-taħlita tiġi uniformi u li nibqgħu ngħaġnu sakemm il-marġerina titħallat sew – iġifieri ma tibqax tara biċċiet ta’ marġerina magħquda
6. Kif tara li għandek taħlita tajba, ibda żid l-ilma ftit ftit biex toħroġ l-għaġina. Importanti li l-ilma jkun fietel u mhux kiesaħ jew jaħraq. Ma ninsewx li l-ħmira hija oġġett ħaj. Jekk titfa’ ilma jaħraq tismotha u l-ħmira tmut; jekk titfa’ ilma kiesaħ ħafna, kapaċi tmajna l-proċess li l-ħmira tagħmel biex tgħolli l-għaġina u tkun qisek m’għamilt ħmira xejn
7. Għaġen sew. L-għaġina turik waħedha – meta ma tibqax twaħħal ma’ jdejk, ifisser li tkun lesta
8. Għamilha f’forma ta’ balun, itfagħha fi skutella u għattiha b’sarvetta ħalli tibqa’ tieħu l-arja u fl-istess ħin iżżomm umda. (Il-ħmira, f’dan il-każ, għandha bżonn l-arja biex tagħmel xogħolha)
9. Ħalli l-għaġina toqgħod lejl

L-għada…

1. Lesti tilar u għattieh bil-baking paper
2. Roxx ftit dqiq fuq il-wiċċ fejn qed taħdem u għaġen l-għaġina għal ftit ħin
3. Aqta’ biċċiet tal-għaġina u fforma ballun. Biex tieħu idea tal-qis, il-biċċiet li taqta’ – meta tagħmilhom f’forma ta’ ballun – iridu joqgħodu eżatt fil-pala t’idek meta tagħlaq idek ponn magħhom
4. Poġġi fuq wiċċ ċatt u rrombla sakemm tifforma dudu ta’ l-għaġina imbagħad dawwar biex tagħmel ċirku ħalli tifforma l-qagħqa
5. Ħu ħsieb li ma tagħmilx il-qagħqa ħoxna ħafna li jkollok toqba żgħira wisq fin-nofs. Dan għaliex il-ħmira, se ttella’ l-għaġina u tħaxxina, għalhekk tispiċċa b’qagħaq bla toqba fin-nofs
6. Irridu noqgħodu attenti wkoll li nagħmluhom kollha ta’ l-istess ħxuna biex jinħmew kollha ndaqs
7. Kull waħda li tlesti itfagħha fuq it-tilar
8. Kif tkun użajt l-għaġina kollha, ħalli l-qagħaq joqgħodu għal siegħa
9. F’xi ħin, ibda saħħan il-forn għal temperatura ta’ 16o°
10. Qabel iddaħħal fil-forn, aqbad pinzell u isboħ ftit ilma fuq il-wiċċ ta’ kull qagħqa u ferrex ftit żerriegħa tal-ġulġlien
11. Aħmi għal bejn 15 u għoxrin minuta
12. Taħmix għal ħafna iktar ħin – il-qagħaq ikunu lesti meta tara li l-wiċċ ħa ftit kulur però li meta tmisshom ikunu għadhom ftit rotob

Vera tajbin jekk isservihom sħan. Jekk tpoġġihom f’kontenitur li jagħlaq tajjeb, għandhom iżommu friski għal jumejn jew tlieta